Der Riichstagsbrand isch en Schritt gsii uf em Wäg vo der Machtergriffig vom Adolf Hitler. Die isch ansonschte mehr oder weniger uf legalem Wäg dür Wahle verlaufe, wo der NSDAP i der Weimarer Republik immer grösseri Wahl-Ateile brocht hett. Es isch allerding au vill mit Terror und Ischüchterig vo de andere politische Parteie operiert worde. Eis Inschtrumänt dervo isch wahrschiinlich au der Riichstagsbrand gsii. E Brandanschlag uf en Riichstag, s Gebäude vom dütsche Parlamänt in Berlin am 27. Februar 1933, wo drvo relativ schwär beschädigt worde isch. D Nazis hei denn im Nachgang sofort d Kommunischte beschuldigt, hinter däm Brand z schto. S Motiv drvo isch au klar: Me hett en Vorwand gsuecht, si chönne z verbiete und dodermit als Rivale im Parlamänt uuszschalte. Hundert prozäntig schlüssig isch sich d Forschig nitt, dass würklech nitt d Kommunischte (wo jo au keini Demokrate gsi sind), sondern d Nazis d Urheber vo däm Brand gsi sind, aber s gitt ziemlich triftigi Indizie (Hinwise) drfür.